Финалето на фудбалската Лига на шампионите во сезоната 2026/27 ќе се игра на стадионот Ванда Метрополитано каде што настапува Атлетико Мадрид.

Оваа информација ја откри претседателот на шпанската фудбалска федерација Рафаел Лузан, а ја пренесува „Марка“.

– Оваа година, Шпанија го има финалето на Лигата на Европа на УЕФА на „Сан Мамеш“ во Билбао, а ние исто така го имаме загарантирано финалето на Лигата на шампионите во 2027 година на стадионот „Ванда Метрополитано“ во Мадрид. Ќе гледаме и да бидеме домаќини на европско финале во Севиља, тука имаме одлична инфраструктура за да организираме одличен настан – вели Лузан.

Стадионот Ванда Метрополитано веќе беше домаќин на финалето на Лигата на шампионите на УЕФА во 2019 година кога Ливерпул го совлада Тотенхем.

Лузан откри и дека стадионот на Атлетико Мадрид нема да биде домаќин на натпревари од Светското првенство во 2030 година, бидејќи е одлучено домаќин да биде Местаља во Валенсија.