Агенцијата за филм на РСМ информираше дека на локации во Грција почнало снимањето на филмот „Зад стоговите сено“ на режисерката Асимина Проедроу од Грција. Филмот е копродукција помеѓу Грција, Северна Македонија и Германија. Овој филмски проект е поддржан од Грчкиот филмски центар, Агенцијата за филм на РСМ, а финансиска поддршка има и од Еуримаж (Европски фонд за копродукција и дистрибуција на кинематографски и аудиовизуелни дела).

Снимањето на филмот почна во Грција на 13 јануари 2021, а според оперативниот план на македонски локации во Дојран и Гевгелија треба да се одвива во периодот помеѓу 22 и 28 февруари 2021.

Македонски продуцент на филмскиот проект е „Сектор филм“. Главен продуцент на филмот е продуцентската куќа „Аргонаутс продукција“, а копродуценти покрај „Сектор филм“ од Скопје, се и „Fiction Park – Entertainment Halbershmidt Tsika GbR“ од Германија. Дејствието на филмот се одвива во 2015 година и го прикажува животот на населението од двете страни на границата.

(Текстот е објавен во „Културен печат“ број 66, во печатеното издание на „Слободен печат“ на 30-31 јануари 2021)