Филмот „Домаќинство за почетници“ во режија и по сценарио на Горан Столевски, успешно се претстави на Филмскиот фестивал во Венеција. На ова 80. издание на Мостра, филмот на Столевски ја имаше светската премиера, а пред присутната публика беше прикажан и репризно.

Агенцијата за филм, преку социјалните медиуми објави за ова македонско остварување, кое беше поткрепено и со видео од целата атмосфера во Венеција.

„Долги стоечки овации и многу солзи во преполната „Sala Darsena“, „Домаќинство за почетници“ ја воодушеви публиката!“, напишаа од Агенцијата за филм.

Филмот доби и позитивни критики во британскиот филмски магазин „Скриндејли“ („Screen Daily“), каде што посочија дека Горан Столевски испорачува уште еден триумф со домашната приказна за маргинализираните луѓе.

„Последниот филм од австралискиот режисер роден во Македонија, Горан Столевски, е феноменално достигнување – нескротлива, детална драма, која пука со толку многу бесна енергија што практично добивате шок од екранот… Самоуверениот карактеристичен глас на Столевски, како филмски уметник, е очигледен уште од самиот почеток… Неговото раскажување е свежо, автентично и навистина возбудливо…“, пишува „Скриндејли“.

Од Агенцијата за филм, посочуваат дека неодамна се склучиле договори за дистрибуција со „Фокус фичрс“ („Focus Features“), кој ќе го дистрибуира филмот на територијата на САД и „Јуниверсал пикчрс“(„Universal Pictures“), кој ќе го дистрибуира во југоисточна Европа.

Инаку, филмот на македонско-австралискиот режисер е дел од натпреварувачката програма „Хоризонти“ (Orizzonti) и се бори за наградите за најдобар филм, најдобра режија, најдобро сценарио, специјална награда од жирито и за најдобра машка и женска улога.