Претседателот на СДСМ, Венко Филипче, во интервју за „Сител“ вечерва рече дека Владата „води неискрена политика во однос на европските интеграции и свесно го пролонгира процесот без визија и без храброст“.

„Сметам дека повикот за консензус на таа тема не е искрен целосно од страна на власта. Сметам дека нема никаква намера да се направи чекор напред кон евроинтеграциите“, вели тој.

Филипче потсети дека „францускиот предлог“ беше прифатен во отсуство на подобра опција, со јасна перцепција дека тоа е единствениот реален пат.

„Тоа што ние сме го прифатиле „францускиот предлог“ е затоа што таков предлог дојде спремен од Европската Унија и ни беше јасно дека друга шанса нема да имаме“, рече Филипче.

Тој вели дека и самата ВМРО-ДПМНЕ, и во критиките, и во ветувањата, знае дека „друга опција нема“, а „токму на тоа ја добија и довербата лани“. Филипче повтори дека СДСМ дава бланко-поддршка ако издејствуваат подобри услови. Но откако тие услови не доаѓаат, тој предупреди дека „не смее државата бесцелно да чека“. Наместо тоа, СДСМ предлага конкретен механизам за заштита на државните интереси:

„Ајде тогаш да донесеме заедничка резолуција, наша во Собранието, во која ќе ги кажеме нашите „црвени линии“. Еве, ако потоа се случи ново вето, да ги прекинеме преговорите со ЕУ“, предлага Филипче.

Тој вели дека Македонија „губи време и можности“. Младите, според Филипче, гледаат застој и тоа директно влијае на нивната одлука да ја напуштат државата.

„За првпат во анкетите се појавува прашањето на иселувањето на младите како едно од најважните проблеми, веднаш по правосудството, корупцијата и евроинтеграциите. Иако ВМРО-ДПМНЕ тврди дека прашањето на ЕУ не е приоритет, истражувањата покажуваат спротивно – огромна поддршка има и кај Македонците и кај Албанците. Не смееме тоа да го занемариме. Сметам дека се губи време. Сите се свесни дека ние подобар предлог нема да добиеме и ја охрабрувам Владата да каже до кога ќе се обидува“, рече Филипче.