Кавадаречкиот планинар Никола Минчоров е добитник на плакетата „Даре Џамбаз” за животно дело, потврдија од македонската Федерација на планинарски спортови. Тој е долгогодишен член и актуелен претседател на планинарско спортското друштво „Орле” од Кавадарци, а престижната плакета со ликот на Даре Џамбаз за 2020 година ја добива за неговата долгогодишна активност и придонес за развој на македонското планинарство.

На онлајн седницата на претседателството на македонската Федерација на планинарски спортови било одлучено да се додели плакета и на Планинарскиот спортски клуб „Ѓорѓи Наумов” од Битола, кој оваа година слави јубилеј – 60 години традиција, но и за придонес во развојот на македонското планинарство.

– За врвно спортско остварување во планинарството за 2020 година, плакета се доделува и на Илина Арсова од ДПС „Трансверзалец” од Скопје, а признание за млада надеж во планинарството на Меланија Јовановска од ПК „Ај Лав Хајкинг Груп Маседонија, додаваат од Федерацијата.