Конфликт во Скијачката федерација на Македонија го оптовари настапот на македонскиот тим на ЗОИ 2022. Тренерот на алпските скијачи на македонската репрезентација Антонио Ристевски, кој се наоѓа на ЗОИ Пекинг 2022, преку социјалните мрежи реагираше жестоко на до него доставеното барање од претседателот на Скијачката федерација на Македонија Огњан Циговски, во кое се вели дека од 31 јануари се нема јавено на работа и се бара до петок писмено да извести за причините за неговото отсуство.

Ристевски, кој на ЗОИ го водеше алпскиот скијач Дардан Дехари што беше објавено во сите медиуми, смета дека со ова барање СФМ врши тортура над него и сака да го избрка од скијањето.

Циговски ни изјави дека барањето на СФМ е од формална природа затоа што Ристевски и покрај тоа што редовно добива плата од Федерацијата, 11 месеци не дава информации за тоа што работи. Ристевски не може да сфати како во СФМ не знаат каде е тој.

– Замислете, целата јавност знае дека сме на ЗОИ, само г. Огњан Циговски не знае! Го пишувам ова јавно бидејќи сум огорчен. Дури 11 месеци трпам тортура, а надлежните државни институции се неми за нечие самовластие. Цел овој период и живеев со целиот тој стрес секој ден, во интерес на македонските скијачи и македонскиот спорт, пред сè поради олимписките квалификации и Олимписките игри во Пекинг 2022. Целата оваа фарса против мене, мојот клуб и мојата должност како главен тренер на алпските репрезентации во Скијачката федерација и најдобрите македонски алпски скијачи е јасна, сакаат да ме отстранат од спортот. Како што сте тргнале, ќе бидете запомнети како гробари на македонското спортско скијање. Па, да ви кажам, јас бев и сум на ЗОИ во Пекинг заедно со Дардан, каде што гордо и достоинствено ја претставуваме нашата држава. Ние ќе бидеме светлата страна на историјата. Тоа не може да го избришете со мејлови, закани, препорачани писма, забрани за тренинг на „вашето Маврово“. Можеби можете да ме избркате од работа, но спортската душа никогаш нема да ми ја одземете – вели меѓу другото Ристевски обраќајќи се до Циговски во врска со неговото по имејл испратено барање да го информира каде е.

Според Циговски, не станува збор за никакво бркање од работа, туку СФМ како работодавач на Ристовски бара тој да ја информира Федерацијата за тоа каде е и што работи, на што има право како и секој работодавач.

– Никој не споменал никакво бркање од работа, никаков отказ на Ристевски. Едноставно, Федерацијата формално-правно како работодавач на Ристевски треба да биде известена од него каде е и што работи. Тој 11 месеци не го сторил тоа. Ние го плаќаме и сакаме да имаме информации од него што работи. Тој 11 месеци не се појавил во Федерацијата. Не кажал кого тренира, каде тренира, зошто тренира. Тоа е преписката. Како работодавец сакаме да знаеме што тој работи. Секој месец тој добива плата, а од него немаме информации што работи. Ако тренира врвни скијачи, нека каже каде, кого тренира. Ние дадовме согласност и писмо тој да оди на ЗОИ заедно со Дардан Дехари. Ние знаеме физички каде е и што прави. Но тој се нема (формално, н.з.) јавено до нас. Тој и не можеше да отиде на ЗОИ ако матичната федерација не дадеше согласност да оди. Немаме извештаи, ни каква било информација од него каде е и што прави. Немаме ништо против Антонио. Затоа и го плаќаме. До петок треба да ни каже што прави, а потоа ќе го викнеме на разговор – ни објаснува Циговски.

Нашиот единствен алпинец на ЗОИ Дардан Дехари нема да настапи во велеслалом и слалом затоа што се повреди на тренинг.