Со одлична и храбра игра Македонија вечерва во СЦ „Борис Трајковски“ успеа да ги надполни седумте голови негатива од гостувањето на Фарски Острови. Избраниците на Кире Лазаров славеа победа со 34:26.

Уште од првата минута на теренот можеше да се забележи желбата кај македонските репрезентативци да покажат дека поразот во Торшван бил само еден лош ден.

Натпреварот започна ефикасно со голови и на двете страни. За првпат до два гола разлика дојдовме со водството од 7:5. Се обидуваа гостите, но никако не успеваа да дојдат до изедначување.

Некаде кон средината на првото полувреме македонските ракометари дојдоа и до плус три (13:10), а таа серија продолжи и до највисоките до тој момент 15:10.

Во тие моменти атмосферата во салата веќе започна да се загрева, публиката чувствуваше дека предноста која ја имаат гостите не е недостижна. На пауза заминавме со половина завршена работа и водство од 19:15.

Вториот дел донесе уште подобра игра, одбраната во нашите редови предводена од Никола Митревски беше поцврста. Многу брзо по само пет минтуи игра во второто полувреме успеавме да ја стигнеме негатива од седум гола.
Митревски освен што беше одличен на голот, се истакна и со една пресечена топка на средината од теренот.

Во 47. минута дојдовме до највисоките во тој момент „плус 9“ и тоа значеше дека имаме два гола предност во вкупниот резултат. Тогаш одново следуваше исклучување во нашите редови, на клупата беше испратен Милан Лазаревски. 

Со предноста од девет гола влеговме и во последните десет минути од натпреварот. Фарски Острови токму на истекот на 50. од пенал намалија на 30:22, но Серафимов на спротивната страна возврати за нас за нови девет гола водство.

Некаде на три-четири минути до крајот дојде до мал пад во нашата игра па Фарски Острови се врати на седум голови негатива и натпреварот влезе во неизвезна завршница.

Марко Митев кој беше еден од најдобрите се погрижи во следниот напад да ја врати вкупната предноста во корист на Македонија. Клучен момент во овие последни моменти веројатно беше промашувањето и стативата на ракометарите на Фарски Острови.  Жарко Пешевски го постигна голот на 20-тина секунди до крајот со кој поведовме за веќе недостижна предност на гостите.