Руралните заедници во Украина имаат потреба од „итна помош“ за да можат да сеат семе и да обезбедат егзистенција во сегашниот контекст на војна, предупреди денес Организацијата за храна и земјоделство на Обединетите нации (ФАО), цитирана од Агенцијата Франс Прес. Во соопштение за медиумите, ФАО предупреди дека „без итна и одржлива поддршка, илјадници рурални домаќинства во Украина можеби нема да можат да сеат или жнеат навреме, што би ја загрозило националната безбедност на храната“. ФАО повикува на „значајни напори за поддршка на локалните системи за производство на земјоделско-прехранбени производи“ и, особено, на украинските земјоделски семејства, чија „улога во националната безбедност на храната, локалните економии и долгорочното закрепнување е незаменлива“.

Недостатокот на средства продолжува да го ограничува целосното спроведување на Планот за итен одговор и рано закрепнување за 2025-26 година, кој ФАО го започна во април. Планот од 150 милиони евра има за цел да „им помогне на повеќе од половина милион ранливи луѓе да го обноват земјоделското производство“ во земјата, која пред војната беше светски лидер во производството на пченица и сончоглед. Иако Украина сè уште успева да извезува милиони тони житарки и семки од сончоглед, ситуацијата во руралните области е многу тешка, забележува ФАО, објави БТА.