Престижниот „Фајненшл тајмс“ ја нарекува Албанија „Мала Италија“ во анализа за туристичкиот бум кој е предизвикан од убавината на природата и очекуваните евтини цени во оваа земја.

Во долгиот напис се нагласува дека странските патувања во Италија се намалени за 20,30% во однос на периодот пред една година поради цените, што ги натера странските туристи да летуваат на плажите на Албанија за подостапни цени.

Написот е поткрепен и со статистиката на Евростат според кои во првиот квартал од годинава странските туристи во Албанија имале 261 илјада ноќевања, што е зголемување во однос на претходната година.

„Фајненшл тајмс“ понатаму пишува дека Албанија е една од најсиромашните земји во регионот, која со децении се обидува да ја оттргне репутацијата на корумпирана и со доминантен организиран криминал поради што илјадници Албанци беа принудени да емигрираат, но сега ужива економско заживување со приливот на голем број туристи.

Во нивниот напис се споменува и кратката посета на италијанската премиерка Џорџа Мелони, која одбрала да го помине својот одмор со семејството во Валона.

Италијанските медиуми јавуваат дека според германската федерална агенција за статистика, цените на хотелите и рестораните во Албанија биле за 56% пониски од оние во Германија, што ја прави оваа земја атрактивна за одмор не само поради убавината, туку и поради ниските цени.