На 9 јули, Европскиот парламент го усвои извештајот на Европската комисија за напредокот на Босна и Херцеговина за 2023 и 2024 година, потврдувајќи ја силната поддршка за кандидатурата на БиХ за пристапување во ЕУ, но нагласувајќи дека процесот е базиран на заслуги, усогласен со Копенхашките критериуми и заснован на единството, суверенитетот и територијалниот интегритет на земјата.

Извештајот беше усвоен со 459 гласови „за“, 130 „против“ и 63 „воздржани“, објави РСЕ.

„Поздравувајќи ја одлуката на Европскиот совет за отворање преговори за пристапување со БиХ, во услови на променлив геополитички пејзаж, по руската инвазија на Украина, европратениците ги признаваат клучните реформи, но изразуваат загриженост за застојот во напредокот и слабата имплементација“, се вели во извештајот.

Извештајот повикува на спроведување на потребните уставни и изборни реформи, како и напори за зајакнување на демократските институции и владеењето на правото, како и борбата против корупцијата и организираниот криминал.

Европратениците остро ја осудија „раздорната реторика и сецесионистичките политики, особено оние што ги промовираат претседателот на Република Српска (РС) Милорад Додик и раководството на РС“, поради што ја повикаа ЕУ да преземе решителни мерки, вклучително и целни санкции, за „справување со дестабилизирачките сили што ја загрозуваат стабилноста на земјата и европската безбедност“.

Во извештајот се истакнуваат и загриженостите за „злонамерното надворешно мешање и кампањите за дезинформации од страна на странски актери, особено Русија и Кина, кои ја поткопуваат довербата на јавноста во ЕУ“.

„Иднината на Балканот е во Европа, а не под руска доминација. Босна и Херцеговина е во најтешка ситуација во Европа по Украина и ние мора да најдеме начин да ѝ помогнеме да постигне целосна интеграција во западните структури“, рече известувачот на Европскиот парламент за БиХ, Ондреј Коларж.

Според него, настаните во БиХ секојдневно покажуваат дека мора да се стремиме кон мир, стабилност и развој во БиХ, оценувајќи дека, доколку ова се пропушти, „може да се вратат војната и уништувањето“.