Европската комисија предлага повторно да се воведат санкции за увоз на стоки од Израел како одговор на војната на Израел во Појасот Газа и континуираните кршења на законот во окупираниот Западен Брег. Високиот претставник на ЕУ за надворешни односи, Каја Калас, изјави дека трговската размена меѓу ЕУ и Израел минатата година изнесувала 42,6 милијарди евра, а целта на санкциите е да се намали тој износ за 37 проценти, објави денес Eуроњус.ком.

Поточно, станува збор за суспендирање на одредени одредби поврзани со трговијата во рамките на Договорот за асоцијација меѓу Израел и ЕУ. „Овој чекор дефинитивно ќе има висока цена за Израел“, рече Калас. Таа истакна дека ако има земји кои не се согласуваат со тој план, тогаш треба да смислат алтернативи, особено ако признаат дека ситуацијата на терен во Газа е неодржлива.

– Имавме многу интензивни дискусии во Советот за надворешни работи на ЕУ за ова. Моето прашање до сите мои колеги, бидејќи не станува збор само за Германија, беше дека ако се согласите дека ситуацијата е исклучително сериозна, катастрофална и неодржлива, што ќе правиме во врска со тоа? Ако не ги поддржите овие мерки, какви мерки можете да поддржите? Понудете алтернативи – рече Калас. Претседателката на Европската комисија, Урсула фон дер Лајен, минатата недела објави план за трговски санкции против Израел, пренесува Србија данас.