„Не е мое да коментирам договори на државата со трети страни“ – ова е одговорот на евроамбасадорот Михалис Рокас запрашан како Европската унија го коментира договорот на македонската влада за стратешко партнерство со Велика Британија и задолжувањето кое може да достигне шест милијарди евра.

Сепак, Рокас го поздрави стратешкото партнерство со Велика Британија и наведе дека договорот е сличен на оној што Британија го има со ЕУ и дека тој е „добредојден“ за земјава, пренесе ТВ „24“

Рокас одбегна да коментира дали договорот има врска со наводните бегалски кампови, што ги спомена британски „Тајмс“, кој објави дека Косово веќе прифатило да разговара со Обединетото Кралство за отворање офшор-центри за враќање на мигранти кои не ги добиле азилските барања, а според весникот, меѓу потенцијалните домаќини се уште и Македонија и Босна и Херцеговина. Премиерот Мицкоски децидно ги демантираше таквите тврдења.

Во меѓувреме, опозицијата продолжува да го напаѓа новиот заем. Лидерот на СДСМ, Венко Филипче, на средба во Прилеп го означи задолжувањето како преседан и кривично дело, потенцирајќи дека Македонија се соочува со економска криза.

„Овој заем што го зедоа од Велика Британија е навистина преседан. Ние мислевме преседан е унгарскиот кредит, но не можело и повеќе. Да земеш влада со влада, без контрола, пари со непознати камати, со непознати рокови – тоа е криминал. Тоа е како да одам јас со вашата лична карта во банка да земам кредит, да не ви кажам ништо, од утре вие да плаќате камати, пари, рокови, не знаете, ништо не сум ви кажал. Тоа е основа за кривично дело. Ама во нашата ситуација со Владата тоа е бизнис, очигледно“, рече Филипче.

Со британскиот кредит, според најавите од Владата, треба да се финансираат инфраструктурни и здравствени проекти, вклучувајќи изградба на брза пруга од Табановце до Гевгелија. Владата не ги открива условите на кредитот и каматната стапка која ќе ја плаќаат граѓаните, ама уверува дека тие ќе бидат поволни. Експертите и опозицијата бараат повеќе транспарентност околу најголемото задолжување на земјава од од прогласувањето на нејзината независност.