Претставниците на земјите-членки на ЕУ  постигнаа договор за 17-тиот пакет санкции против Русија, кој треба да биде потврден од министрите за надворешни работи следната недела.

Новиот пакет санкции вклучува речиси 200 нови танкери од таканаречените „флота во сенка“ што ги користи Русија за заобиколување на санкциите.

Станува збор за стари, неосигурени бродови кои користат различни трикови за да го прикријат потеклото на нафтата што ја носат, вклучително и испраќање фалсификувани податоци и исклучување на транспондерите.

Се сомнева дека бродовите се користат и за саботажа на подморската инфраструктура.

Досега на санкционираната листа има 153 вакви бродови на кои им е забрането приклучување во европските пристаништа.

Сега тој број се искачува на околу 350 бродови. На санкционираната листа се додадени 30 компании кои се вклучени во заобиколувањето на санкциите, особено кога се работи за производи со двојна употреба.

Тие компании ќе се соочат со нови трговски ограничувања. Додадени се уште 75 лица и фирми поврзани со воено-индустрискиот комплекс. Со него се забранува и извоз на хемикалии од ЕУ кои можат да се користат за производство на ракети.

Освен овој 17-ти пакет, ЕУ се заканува со нови масовни санкции доколку Русија не се согласи на безусловен прекин на огнот во Украина.