Со загриженост ги следиме случувањата во врска со националниот давател на услуги за воздушна навигација (M-NAV). Императив е именувањата во националниот давател на услуги за воздухопловна навигација и поврзаните услуги, исто како и за другите институции, да се базираат на заслуги, квалификација и искуство, стои во одговорот кој Делегацијата на ЕУ го испрати до „Слободен печат“ околу нивниот став за последните случување во М-НАВ

„Потсетуваме на фактот дека Северна Македонија се обврза да го имплементира законодавството на ЕУ што се однесува на провајдерите на услуги за воздушна навигација (АНСП). Ова вклучува одредби за обезбедување нивна независност од државата, потоа дека персоналот, особено контролорите на летање, ги исполнува законските барања за такви работни места и дека обезбедувањето на услугата ги почитува задачите во однос на безбедноста економичноста, капацитетот и животната средина“, соопштуваат за „Слободен печат“ од делегацијата на ЕУ.

Оттаму очекуваат државните власти брзо да ги истражат наводите за пристрасност, односно неправилности при назначувањата во овие служби.

„Исто така, очекуваме државните власти да ги истражат извештаите за несоодветно надворешно влијание и насилство врз персоналот што работи во М-НАВ, додаваат од делегацијата на ЕУ.

Слободен печат се обрати и до Европската организација за навигација и безбедност на воздушниот сообраќај „Еуроконтрол“ во врска со инцидентот во М-НАВ кога на работно место беа нападнати вработени во оваа институција.

„До Еуроконтрол не беше пријавен никаков проблем и немаше промени нормалниот добар контакт и комуникации со контролорите на летање во Скопје, стои во кусиот одговор кој „Еуроконтрол“ го испрати со „Слободен печат“.

Инаку Струковиот синдикат на контролори на летање (ССКЛ) го стави во мирување штрајкот што го најави за утре со целосно затворање на воздушниот сообраќај на македонското небо, откако Владата денеска му препорача на Надзорниот одбор во Македонска навигација М-НАВ да ги разреши претседателот на Управниот одбор на М-НАВ Фахрудин Хамиди и секторскиот извршен директор во М-НАВ Љубе Стаменковски, а на нивно место да бидат именувани Илир Мехмеди и Милан Кораќ.

Претходно, од Владата за МИА информираа дека на денешната седница е дадена насока на Надзорниот одбор на Акционерско друштво во државна сопственост за вршење на дејноста давање услуги во воздухопловна навигација „М-НАВ“ А.Д. – Скопје да ги разреши Фахрудин Хамиди од должноста претседател на Управен одбор и извршен директор во СВН и Љубе Стаменковски од должноста член на УО и извршен директор во СВТ. Владата воедно му препорачала на Надзорниот одбор „М-НАВ“ за извршен директор во СВН да го именува Илир Мехмеди, а за извршен директор во СВТ да го именува Милан Кораќ.

За инцидентот на 4 јануари во М-НАВ, Основното јавно обвинителство Скопје, како што соопшти, отвори истражна постапка против осум лица за кои постои основано сомнение дека како соизвршители сториле кривично дело – Загрозување на безбедноста на воздушниот сообраќај според член 303 став 2 во врска со член 22 од Кривичниот законик.

Претходно ССКЛ побара директорите да си поднесат оставки или да бидат разрешени од Владата, која најави соопштение за денешните одлуки.

Илир Мемеди е нов предводник на контролата на македонското небо