Европската Унија претстави нова стратегија насочена кон зајакнување на безбедноста и стабилноста во регионот на Црното Море.

„Оваа стратегија има за цел да ја подобри поврзаноста и развојот преку поврзување на Европа со Јужен Кавказ, Централна Азија и пошироко“, се вели во официјалното соопштение на ЕУ.

Според најавите, ЕУ планира да ја продлабочи соработката со Украина, Молдавија, Грузија, Турција, Ерменија и Азербејџан, како и да ги унапреди регионалните проекти фокусирани на инфраструктурно поврзување.

Високата претставничка на ЕУ за надворешна политика, Каја Калас, на брифинг со медиумите се осврна на новата иницијатива – Центарот за поморска безбедност на Црното Море.

„Овој центар ќе служи како европски систем за рано предупредување во Црното Море. Ќе ја зголеми свеста за ситуацијата и ќе помогне во заштитата на критичната инфраструктура, како што се офшор инсталациите и подморските кабли“, рече Калас.

Таа додаде дека центарот би можел да придонесе и за следење на мировните напори меѓу Русија и Украина и најави зајакнување на операциите за деминирање во регионот.

Калас заклучи дека ЕУ сака да ја зајакне соработката во борбата против сајбер нападите, дезинформациите и другите непријателски активности, нарекувајќи го регионот на Црното Море примарна цел на хибридни закани.