Огромен облак од пепел, гас и камења се исфрли од италијанската планина Етна, најголемиот активен вулкан во Европа, но властите соопштија дека моментално нема опасност за населението, пишува Гардијан.

Сликите покажуваат огромен сив облак како се издига од вулканот на островот Сицилија, почнувајќи околу 11:24 часот по локално време во понеделник, според Националниот институт за геофизика и вулканологија.

Камерите за надзор покажаа „пирокластичен тек веројатно произведен од колапс на материјал од северниот дел на југоисточниот кратер“, соопшти агенцијата.

Пирокластичен тек се јавува кога вулканските карпи, пепелта и топлите гасови излегуваат од вулканите. Тие се исклучително опасни.

Експлозивната активност „се претворила во фонтана од лава“, соопшти агенцијата, при што се очекува облакот од пепел да се распрсне кон југозапад.

Претседателот на регионот Сицилија, Ренато Скифани, рече дека експертите го увериле дека „нема опасност за населението“, бидејќи протокот не ја поминал Долината на лавовите, област што ја посетуваат туристи.

Видеата објавени на социјалните мрежи прикажуваат туристи како брзаат по страната на вулканот, некои фотографираат, но Агенцијата Франс Прес не можеше да ја утврди нивната автентичност.

„Делумното уривање на југоисточниот кратер, кое генерираше импресивен еруптивен облак висок неколку километри и пирокластичен тек, е феномен што го следиме со голема претпазливост“, рече Шифани.

Шефот на регионалната единица за цивилна заштита, Салво Кочина, препорача туристите да ја избегнуваат областа „со оглед на потенцијалната еволуција на феноменот“.

Црвен аларм издаден за воздухопловните власти вели дека висината на вулканскиот облак е проценета на 6,5 километри.
Блискиот аеродром во Катанија сè уште работи.