Турскиот претседател Таип Ердоган во вторникот изјави дека Турција нема да дозволи Сирија да биде фрагментирана или нејзиниот територијален интегритет да биде загрозен доколку дипломатијата за спроведување на договорот за интеграција меѓу Сириските демократски сили предводени од Курдите и сириската влада не успее.

„Ги ангажиравме сите дипломатски канали за да го зачуваме територијалниот интегритет на Сирија и да спречиме формирање терористичка структура преку нашите граници.

Продолжуваме да ги користиме овие канали со трпение, искреност и здрав разум“, рече Ердоган на настанот по повод повторното отворање на парламентот, објави Ројтерс.

Според него, доколку дипломатските иницијативи останат неодговорени, политиката и ставот на Турција се јасни.

„Турција нема да дозволи сценарио што веќе го видовме да се повтори во Сирија“, рече турскиот претседател.

Официјална Анкара ги смета Сириските демократски сили (SDF) за терористичка организација и предупреди за воена акција доколку не се интегрира во сирискиот државен апарат во согласност со постигнатиот договор.