Турскиот претседател Реџеп Таип Ердоган изјави дека САД треба веднаш да ја преиспитаат својата одлука за одбивање на визи за палестинските функционери и да им забранат да присуствуваат на состанокот на Генералното собрание на Обединетите нации во Њујорк подоцна овој месец.

Како што Ердоган им рече на новинарите за време на враќањето од Кина, таков потег на САД не е во согласност со причината за постоењето на ОН.

„Оваа одлука треба итно да се преиспита. Генералното собрание на ОН постои за да дискутира за светските прашања и да наоѓа решенија“, рече Ердоган, објави Ројтерс.

Како што додаде турскиот претседател, отсуството на палестинската делегација на Генералното собрание на ОН само би го задоволило Израел.

Ердоган заклучи дека се очекува САД да кажат „стоп“ на израелските масакри и суровост.

Американскиот Стејт департмент во петокот објави дека САД одбиваат да издаваат нови визи и ги откажуваат постојните за членовите на Организацијата за ослободување на Палестина (ПЛО) и Палестинската самоуправа (ПА) пред сесијата на Генералното собрание на Обединетите нации во септември.

Ограничувањата значат дека палестинскиот претседател Махмуд Абас, кој управува со окупираниот Западен Брег, нема да може да патува во Њујорк за да се обрати на годишниот собир, како што обично прави.

Американската администрација ја донесе одлуката откако воведе санкции врз претставници на Палестинската самоуправа и членови на Организацијата за ослободување на Палестина во јули, кога неколку други западни земји, вклучувајќи ја и Франција, почнаа да размислуваат за признавање на државата Палестина.