Турскиот претседател Реџеп Таип Ердоган и американскиот претседател Доналд Трамп, разговараа за можни заеднички чекори за решавање на конфликтот во Украина за време на состанокот во Белата куќа, изјави денес турскиот министер за надворешни работи Хакан Фидан.

„Тие разговараа за тоа какви чекори можат да се преземат за решавање на конфликтот во Украина“, изјави Фидан на прес-конференција во Њујорк, објави Ројтерс.

Трамп и Ердоган се сретнаа во Белата куќа во четврток, кога Трамп рече дека Турција најмногу би можела да помогне во завршувањето на војната со тоа што ќе престане да купува руска нафта.

„Можам да ви кажам дека претседателот Ердоган е многу почитуван од лидерите на Украина и Русија, сите го почитуваат Ердоган. Јас го почитувам и мислам дека би можел да има големо влијание ако сака. Тој е многу неутрален во моментов – сака да биде неутрален, а и јас, сакам да бидам неутрален“, рече Трамп во тоа време.

Тој повторно го изрази своето разочарување од рускиот лидер Владимир Путин за продолжувањето на она што го нарече бесмислена војна, велејќи дека е време Русија да престане. „

Како што знаете, посредував за седум војни и мислев дека оваа ќе биде една од полесните. Но, многу сум разочаран од Путин“, рече Трамп.

Американскиот претседател додаде дека, и покрај загубите на Русија во милиони и нејзините ограничени достигнувања на бојното поле, Путин продолжува да се бори.

„Нема да наречам никого „хартиен тигар“, но Русија потроши милиони и милиони долари на бомби, ракети, муниција и нивните животи, а тие практично не добија никаква територија. Мислам дека е време да се запре тоа“, рече Трамп.