Турскиот претседател Реџеп Таип Ердоган денеска изјави дека одлуката за распуштање на милитантната Курдистанска работничка партија (ПКК) е важен чекор кон Турција без тероризам и дека Анкара внимателно ќе го следи процесот. Ердоган рече дека кога ПКК ќе го остави оружјето, ќе се отвори вратата за нова ера и Турција ќе биде земја без тероризам. Тој посочи дека Турција верува дека потегот вклучува разоружување на курдските милитанти во Ирак, Сирија и Европа, јавува Анадолу.

Ердоган по состанокот на владата изјави дека Турција, без разлика колку е хаотична ситуацијата во светот, ќе обезбеди безбедност на нејзина територија.

Кога станува збор за преговорите меѓу Русија и Украина, Ердоган истакна дека Турција е подготвена да биде домаќин на двете страни и да придонесе во разговорите.

Тој нагласи дека Турција секогаш се залага за мир, стабилност, дипломатија и дијалог, поздравувајќи го договорот за прекин на огнот меѓу Индија и Пакистан.

ПКК денеска одлучи да се распушти и да ја прекине вооружената борба против турската држава, која ја води речиси 40 години. ПКК е означена како терористичка група од Турција, САД и ЕУ, пренесува Танјуг.