Американскиот технолошки гигант „Епл“ ќе се обврзе на дополнителни инвестиции во износ од 100 милијарди долари во производство во Соединетите Американски Држави, објавува „Блумберг“ повикувајќи се на анонимен информиран извор од Белата куќа.

Се очекува претседателот Доналд Трамп официјално да ја објави оваа вест во текот на денот, додал изворот.

„Епл“ во февруари објави дека планира да вложи 500 милијарди долари во американската економија во следните четири години, вклучувајќи и во нова фабрика во Хјустон. Со новата рунда инвестиции, вкупната вредност на планираните вложувања се искачува на 600 милијарди долари.

Новиот план предвидува враќање на дел од мрежата на добавувачи на „Епл“ во САД и почеток на домашно производство на одредени клучни компоненти.

Економскиот советник на Белата куќа, Кевин Хесет, потврди во интервју за „Фокс“ дека се очекува значајна инвестициска најава од „Епл“.