Емотивно обраќање на мајката на Фросина: Барам максимална казна, не за одмазда, туку нејзината смрт да не биде залудна
„Јас сум човек со откорната душа, јас сум гласот на Фросина. Зборувам за неа, затоа што таа не може да зборува. Не се обидел ни да запре, не помислил дека ја удрил мојата Фросинче. Ја скршила шофершајбната, се качила на кровот и го извиткала семафорот од спротивна страна. Брзината била бесконечно поголема. Ниту еден орган не ѝ беше поштеден – мозочното ткиво, срцето распукано, градниот кош отворен. Мојата Фросина остана таму без иднина“, рече мајката на Фросина Кулакова низ солзи на денешното судење.
Препорачано
-Кој збор од Законот може да го опише ова, болката која ја чувствувам секој миг. Ова не е судење за сообраќајка ова е судење за грабеж на живот, за грабеж на иднина, за убиство. Барам највисока казна, не за одмазда, туку за ниедно дете да не ја доживее нашата судбина. Покажете дека правдата има душа и дека злосторството нема да помине. Ќе ми ја вратите вербата дека нејзината смрт не била залудна, за животот, за човечноста – додаде таа.
Ова го кажа по нејзино барање кога беше прашана дали предјавува имотна корист.
ФОТО | Обвинетиот за прегазувањето на Фросина седна на обвинителна клупа со наведната глава
На 29 јануари годинава, Јованов, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје. На пешачки премин, на црвено светло, удрил во Фросина Кулакова, која поминувала на зелено светло за пешаци. Од силата на ударот, Фросина се здобила со тешки телесни повреди и починала на самото место. За делото за кое се товари Јованов е предвидена затворска казна до 20 години.
Судењето започна денеска, со задоцнување од речиси еден час поради доцнење на спроводот од притворот во Шутка. Случајот го води судијката Снежана Марковска.
Во меѓувреме, Основното јавно обвинителство Скопје поднесе обвинителен предлог и против таткото на Васил, Зоран Јованов, за кривично дело „предизвикување општа опасност“ од член 288 став 4 во врска со став 1 од Кривичниот законик.
Обвинението се однесува на периодот од 04.11.2022 до 30.01.2025 година, во кој Зоран Јованов му дозволувал на својот син Васил Јованов да управува со патничко моторно возило „пежо 207“, иако знаел дека синот нема возачка дозвола и е повеќекратен сторител на сообраќајни деликти вклучително и сообраќајната несреќа во која животот го загуби 22-годишната Фросина Кулакова.
