Вкупно 21 процент од броилата на Електродистрибуција се со далечинско управување, а останатите се стандардни електронски броила. Сите броила, според регулативата, треба да бидат паметни за 10 години. Постапката за нивно целосно воведување, како што изјавија од Електродистрибуција за „Слободен печат“, почната е пред шест месеци.

– Електродистрибуција пред шест месеци официјално го започна Проектот за паметни броила, кој е во фаза на анализа и дефинирање на технологијата. По дефинирање на технологијата, ќе се изготви техничка и економска анализа – физибилити студија. Таа ќе се достави до Регулаторната комисија за енергетика, а доколку анализата е основана за РКЕ, таа ќе ѝ предложи на Владата да донесе одлука за воведување ваков систем. Доколку се одобри, започнува постапка за набавка на хардвер и софтвер за паметен систем и реализација на терен – велат од компанијата.

Оттаму појаснуваат дека според законските обврски, во период од седум години од донесувањето на одлуката, треба да се инсталираат паметни уреди кај 80 отсто од корисниците, а во период од 10 години треба да се заврши во целост.

Во врска со реакциите на Здружението на инженери на Македонија дека не смее да има заклучени, односно визуелно недостапни струјомери, Електродистрибуција посочува дека граѓаните тоа треба да го пријават.

– Доколку броилата се заклучени од сопственикот или од управителот на објектот, Електродистрибуција нема можност за да изврши каква било интервенција и неопходно е да се обезбеди пристап до броилото од самиот сопственик/управител, со што на компанијата ќе ѝ се овозможи да направи техничка контрола, отчитување, промена на броило итн. Корисниците што немаат можност да ги отчитаат броилата поради различни причини, може тоа да го пријават телефонски, електронски или во просториите на корисничките енерго центри. Електродистрибуција потоа ќе изврши увид на броилото, отчитување, техничка контрола или слично, и тоа во присуство на корисникот – велат од Електродистрибуција.

Според Правилата за снабдување, обврска на Електродистрибуција е да ги отчитува броилата еднаш во три месеци.

– И покрај тоа, компанијата спроведува редовни месечни отчитувања, кои резултираат со висок степен на отчитаност од над 85 отсто, а овој процент се зголемува на 95 отсто и тоа во рок од само три месеци. Во тие 15 проценти неотчитани броила на месечно ниво, влегуваат непристапни затворени мерни уреди и корисници во одделни рурални средини што не се пристапни во текот на целата година. Истите се отчитуваат во првата дадена можност во наредниот период веднаш по неуспешното отчитување – тврдат од Електродистрибуција.

Оттаму уште еднаш укажаа дека корисниците имаат можност сами да ги пријават состојбите на броилата преку платформата „ЕВН Онлајн“ или во приемните канцеларии на корисничките енерго центри, со достава во посебно обележани сандачиња. Состојбите треба да се пријават во соодветната отчитувачка недела во која припаѓа корисникот.

Ќе направи ли топлото време хаос во сметките за струја?