Двојното убиство кое се случи вчеравечер во Старата скопска чаршија ги вознемири граѓаните, а пресметката во „Шиша бар“ во која маскирани напаѓачи со огнено оружје убија двајца луѓе, првично неофицијално ѝ се припишува на војната меѓу клановите од наркомафијата.

Слична оценка во вестите на „Канал 5“ изнесе и поранешниот началник во МВР и помошник-директор на криминалистичка полиција, Љубомир Ѓурчески.

„Во конкретниот случај, можеби затоа и се ставаат маските, жртвата и сторителите лично и се познаваат. Затоа што станува збор за наркокартели кои делуваат во земјата веќе со години наназад. Основано се сомневам дека нивните пресметки и натаму ќе продолжат, затоа што ова не е наивна ликвидација – Жила беше, да не речам највисоко, ама многу високо позициониран во еден од тие два картели“, рече Ѓурчевски во изјава за телевизијата.

Тој додава дека е оптимист оти сторителите ќе се откријат, иако станува збор за очигледно добро испланирана и извршена ликвидација.

„До сторителите може да се дојде затоа што колку и да се обидуваат да ги сокријат трагите, секој пат оставаат некоја трага која истрагата ќе ја доведе до откривање на сторителите“, вели Ѓурчевски.

Во бруталниот напад врз Јетон Кривањева и Енес Исени синоќа во Чаршија, напаѓачи облечени во црна облека налик на униформи влетале во барот полн со луѓе извикувајќи „полиција!“, по што ги пронашле двете жртви, на кои им пукале во главите од автоматско оружје. По нападот, во кој беше ранет уште еден човек, убијците избегале со автомобил „Ауди А6“, кој вечерта беше пронајден запален во населбата Шуто Оризари.

Убиениот Кривањева бил цел на напад и во драматичниот инцидент во „Александар палас“ пред три години