Домашен ајвар и мармалад, рачно изработени украсни предмети од дрво, разни пчелни производи, плетени торбички, беа само дел од таканаречениот Викторијански базар кој се одржа на Попова Шапка на тема „Taste & explore Shara“ (Вкусете и истражете ја Шара). На базарот се претставија жители на тетовскиот регион чии производи ги пробаа и вкусија посетителите.

Пчеларот Владимир Петровски од Тетово кој со свој штанд се промовираше на базарот, вели дека ваквите настани се многу важни оти на нив може да се промовира нивната работа.

„Со пчеларството се занимавам 15 години, за тоа е потребна желба и љубов, па освен мед, од пред неколку години произведувам и производи од козметика со состојки од пчелни продукти“, рече пчеларот Владимир Петровски.

На базарот учествуваше и семејството Ристовски. Најмладиот член Андријана Ристовска Мариниќ вели дека е горд претставник на Казаница, фирма која е семеен подвиг за зачување на традицијата на овие простори.

„Казаница е многу повеќе за раскажување семејна приказна и традиционално пренесување на семејните вредности, отколку продажба за комерцијални цели. Во бавчите во дворот одгледуваме различни градинарски производи, од кои подготвуваме и вкусни зимници,разни макала, ајвари, мармалади и слично“, изјави Андријана Ристовска Мариниќ.

Предраг Симоновски пак од Општина Јегуновце на штандот на базарот кој се оддржа на Попова Шапка се претстави со рачни изработки од дрво. Со овој занает започнал да се занимава од пред извесно време, откако добил на подарок ваков производ.

На дел од штандовите можеше да се забележат рачно плетени чанти, привезоци и слични производи.

На Базарот со богата културна ументичка програма се промовираа и младите играорци од КУД Бранко Чајка од Тетово.