Коронавирусот му наштети на општеството и ја наруши економската активност во многу земји, вклучително и во САД. Поради силните турбуленции на финансиските пазари, ФЕД ги намали каматните стапки за итните позајмици за ликвидност на банките за 125 базни поени на 0,25 проценти и ја продолжи рочноста на тие заеми на 90 дена. Покрај тоа, Централната банка на САД ја намали задолжителната резерва за илјадници банки на нула, се вели во денешното соопштение на ФЕД.

ФЕД, исто така, објави дека во глобална координирана акција централните банки на Канада, Велика Британија, Јапонија, Швајцарија, САД и Европската централна банка презеле активности за подобрување на ликвидноста на доларот низ целиот свет преку постојните своп аранжмани за долари, нудејќи евтино финансирање во американска валута.

Претседателот на ФЕД, Џером Пауел, на прес-конференција изјави дека централната банка ќе биде трпелива пред да донесе одлука повторно да ја зголеми каматната стапка.