Несомнено голема политичка карика во седумдесеттите години од минатиот век на светскo ниво, музичка легенда и човек кој каде и да се појавел пленел со својата насмевка и мудри зборови е Боб Марли.

Така сега, 38 години откако го напушти овој свет се сеќаваме на единствениот Роберт Неста Марли, уште попознат како Боб Марли, кралот на реге музиката и човекот кој никогаш нема да биде заборавен.

Дека тоа навистина е така зборува и фактот дека вчерашниот ден, денот на неговата смрт, 11 мај, како и денот кога е роден, 6 февруари, се деновите кои никогаш нема да престанат да се слават ширум светот.

Меѓутоа, не само на 11 мај и на 6 февруари, туку многу почесто, речиси секојдневно неговите фанови се сеќаваат на него, преку неговите песни и изреки, кои  постојано се редовна тема на дискусија и анализа.

Дваесетиот век и посебно периодот во кој живеел Марли е период на бројни музички легенди, бројни музички величини кои ја одбележаа историјата на оваа уметност, засекогаш оставајќи еден печат, за потоа едноставно да исчезнат, да ги снема.

Но, кога зборуваме и се сеќаваме на Боб Марли, кој почина на вчерашен ден во 1981 година на само 36 години, секогаш тоа е поинаку, секогаш тоа е со многу поголем елан и многу поголема страст и љубов, а тоа е нешто што мора гласно да се каже.

Не е дека денес нема убава музика и големи музичари, далеку од тоа, но Боб Марли не беше само пејач, тој не беше само реге легенда, тој е историска личност, тој е политичка фигура со големо влијание, посебно во Африка. Тоа е човекот кој преку својата најголема дарба, музиката, не само што ги искажува недостатоците на тогашниот систем во Африка и светот, туку и се бори против нив.

И уште повеќе од тоа, тој му помага на обичниот човек, градејќи школи и училишта во својот роден крај и донирајќи огромни хуманитарни средства во тој период, на тој начин засекогаш оставајќи голем печат во срцата на тамошното население.

Како што гласеле и неговите последни зборови упатени кон неговиот најмлад син  – „Парите не можат да го купат животот“, токму на тој начин и живеел, без разлика на милионите кои ги заработувал од своите турнеи. Тој од почеток до крај се води по својата визија да се бори против системот и да помага. На тој начин се појави на сцената и на тој начин замина од неа.

Не ни пeеше научна фантастика, не учеше на основните човекови вредности и принципи, нешто што изгледа толку лесно и едноставно во теорија, а толку невозможно да се оствари во пракса, а за жал и до ден денес е така.

Засекогаш ќе биде познат по своите големи хитови како „One Love“, „Redemption song “, „Buffalo Solider“ и многу, многу други, но уште повеќе по својата насмевка и оптимизам, со кои зрачел овој човек.

Неверојатната енергија ја демонстрираше на сцената, но и надвор од неа, обидувајќи се и од најнегативниот човек да направи оптимист кој ќе верува во себеси.

Остави огромно музичко наследство, но многу повеќе од тоа, неговата човечност и хуманост живее и во генерациите после него, па многу луѓе, меѓу кои влегувам и самиот, кои не биле ниту родени во негово време, се восхитуваат на неговиот лик и дело.

Не ни останува ништо друго освен да учиме од таквите луѓе, без разлика на тоа што повеќе не се со нас. За тоа колкаво влијание и каква енергија ширел Марли, зборува и фактот дека 38 години по неговата смрт се слави овој ден и тоа насекаде во светот, не само во Африка.

Тоа е случај дури и кај нас во паркот во Скопје, каде што вчера, на 11 мај се прославуваше Боб Марли Деј.

На овој ден преку неговите песни се слави една голема музичка величина, пред се една голема човечка харизма и личност што се борела за еднаквост и правда меѓу сите народи, нешто што дури и денес, 38 години по неговата смрт и понатаму се чини дека е само илузија.