На 16, на 19 и на 23-ти овој месец завршува операцијата на Дирекцијата за заштита и спасување (ДЗС) за целосно уништување на сите минско-експлозивни и убојни средства што се пронајдени во земјава во последните шест месеци. Најголем дел од нив, над 7.000, се откриени кај градскиот стадион во Битола, а 300 убојни средства се откриени кај село Франгово, Струшко.

Како што информираат од ДЗС, последното уништување на минско-експлозивните и убојни средства ќе биде извршено на воениот полигон Криволак, со што ќе се заокружи оваа операција започната во месец декември, кога, исто така, во три наврати се изведоа такви активнисти и еднаш на 5 февруари.

Како што велат оттаму, целата операција ќе мине под буден надзор на првите луѓе од ДЗС, на АРМ и на МВР, како и гости кои редовно присуствуваат на овие уништувања.

– За безбедно уништувањето на средства, сите учесници во самиот чин ќе бидат оддалечени околу два километра од местото на контролираната експлозија, како и сите гости и посматрачи присутни на овој чин, истакна Драгољуб Попоски, пиротехничар од ДЗС. Во операцијата ќе бидат вклучени уште шест негови колеги.