Џорџ Харисон ја подарил на пријател: Исклучително ретка плоча на „Битлси“ продадена за 12.000 евра на аукција
„Исклучително ретка“ плоча на „Битлси“, која Џорџ и Пети Харисон му ја подариле на пријател, е продадена за 10.000 фунти, односно 12.000 евра, објави „РТЕ“.
Препорачано
-
1
-
2
-
3
Станува збор за истоимениот албум од 1968 година, познат како „White Album“ (во превод: „Бел албум“) поради неговата едноставна бела обвивка. Плочата беше продадена во понеделникот преку „Трекс аукшнс“, аукциска куќа специјализирана за музички сувенири во Англија.
На фотографијата од артиклот, објавена на веб-страницата на аукциската куќа, се гледа втиснатото име на бендот на корицата, заедно со серискиот број 0000012.
На веб-страницата, предметот е опишан како „исклучително редок стерео винил на ‘White Album’ со низок сериски број“.
„Многу малку копии со ваков низок број се појавиле на пазарот“, се додава во описот.
Во деталите за аукцијата е вклучено и писмо од продавачот, кој објаснува како се запознал и зближил со Харисон, водечкиот гитарист на „Битлси“, и неговата тогашна партнерка.
Во писмото пишува: „Во шеесеттите бев моден фотограф во Лондон. Пети Бојд ја познавав веќе некое време и една вечер во 1964 година бев во нејзиниот стан, во близина на Хајд Парк Корнер. Звони телефонот, јас го кренав, а на другата страна беше Џорџ Харисон, кој се јавуваше од САД, каде што ‘Битлси’ беа на турнеја. Кога се врати, се запознавме и станавме пријатели. Во наредните години често се гледавме – во ресторани, клубови, во мојот стан во Лондон, во нивната куќа во Ишер и така натаму“.
За плочата, писмото открива: „Еден ден, Џорџ и Пети донесоа копија од ‘White Album’ со низок број во станот. Подоцна, кога разговарав со Џорџ по телефон и му спомнав дека ја имам, тој ми рече: ‘Задржи ја, твоја е’“.
Писмото, исто така, содржи детали за пријателството на продавачот со Харисон, споменувајќи дека музичарот некогаш му подарил 12-жичана гитара и јакна, како и дека го посетил неговиот дом заедно со Џон Ленон и Пол Макартни.
Албумот со 30 песни ги содржи хитовите „Ob-La-Di, Ob-La-Da“, „Blackbird“ и „While My Guitar Gently Weeps“.
Неговата едноставна бела обвивка била дизајнирана од поп-уметникот Ричард Хамилтон.
