Манекенката Џиџи Хадид (28) беше уапсена и обвинета за поседување марихуана и реквизити за дрога, откако минатата недела долетала од САД на Кајманските Острови, пишува „Дејли мејл“.

Манекенката на 10 јули, патувала кон Кајманските Острови со нејзината пријателка Леа Никол МекКарти со приватен авион, а по пристигнувањето, цариниците го скенирале нивниот багаж. Скенирањето поттикнало потемелно пребарување на багажот на двете девојки, при што полицајците откриле мала количина на марихуана и реквизити за консумирање дрога.

Според странските медиуми, девојките биле уапсени под сомнение за увоз на марихуана и прибор што се користи за консумирање на дрога. Претставникот на Џиџи, соопштил дека таа навистина поседувала мала количина на марихуана, но купена легално во Њујорк, со медицинска дозвола.

Ѕвездата и нејзината другарка биле спроведени во притворниот центар на Кајманските Острови, каде што била одредена сумата за кауција, а подоцна биле и ослободени. Тие на 12 јули се појавиле пред судот и се изјасниле за виновни. Откако ја платиле казната од 1.000 долари, обвинението било повлечено и истото нема да им се евидентира.

Краткото време зад решетки не дозволило да влијае на Џиџи, бидејќи таа објавила неколу фотографии на кои се гледа дека ужива во текот на престојот на Кајманските Острови. На една од фотографиите, додека позира во бикини, ја покажала тетоважата со змеј на колкот.