Со евтини понуди во последен момент, домашните агенции се обидуваат да спасат барем дел од туристичката претсезона, која почнува овој продолжен викенд. Граѓаните се откажуваат од евтините летувања од крајот на мај и на почетокот на јуни, особено за Грција, бидејќи немаат нови пасоши, кои како што стојат работите сега, се чекаат и по два месеца.

Најзасегнати за овој период се пензионерите, кои ги користеа евтините аранжмани во овој период, кои сега на „слепо“ резервираат место за септември, бидејќи остварувањето на плановите им зависи од добивањето на новите документи. Иако сите земји од регионот, освен кај нашиот јужен сосед, дозволуваат влез и со лична карта, туристичките работници велат дека помал е интересот за летување во Албанија или во Црна Гора. Хрватска низ годините се профилира како скапа и луксузна дестинација, која не е за сечиј џеб.

Од Агенциите за „Слободен печат“ брифираат дека катастрофално лошо поминале патувањата за трите продолжени викенди – за 8 март, првомајските и велигденските празници, па затоа за јуни се оди на последната карта – максимални поевтинувања во последниот миг. Илјадници граѓани по 12 февруари не може да патуваат надвор од државата, бидејќи немаат извршено промена на личните документи, односно пасоши и лични карти со новото уставно име.

– Првомајските и велигденските тури речиси и не се остварија, а сега се празни и првите претсезонски аранжмани за Грција. Луѓето се револтирани, а ние губиме пари за однапред резервираните апартмани. Јужниот сосед не прима без нови пасоши, а такви граѓани има малку. Особено пензионерите не може да летуваат поевтино – велат во една скопска агенција.

Јаким Маленко од охридската агенција „Виспој“ за нашиот весник открива дека работите полека се средуваат, но јуни ќе биде слаб, не само поради проблемот со пасошите, туку и поради лошите временски услови.

– Јуни по традиција е малку послаб, па интересот се префрла за август и септември, но тогаш аранжманите се далеку поскапи. Околните земји како Албанија и Црна Гора дозволуваат влез и со лична карта, но интересот е далеку послаб. Особено Албанија за која низ годините има сè повеќе заинтересирани, иако и таа дестинација не е веќе така евтина како претходно. Како и да е, граѓаните се навикнати на Грција, блиску е и нуди многу посредени услови за летување – додава Маленко за „Слободен печат“.

Периодов има многу промотивни аранжмани и понуди за рани резервации за летните одмори што се условени со уплата на неповратен депозит.

– Под влијание на несигурната состојба што нема крај, патниците не се расположени да ризикуваат да уплатат аранжман, а да не може да патуваат поради ситуацијата со пасошите. Тоа е директен удар врз бројот на резервации во овој период, кој е намален за разлика од минатата година. Со тоа и самите патници се во загуба, пропуштајќи солидни понуди, кои во јули, август или во септември се повисоки од 30 до 50 отсто – додаваат во друга скопска агенција.

Според Дончо Нацев од „Арбо травел“, туризмот по вторпат за неполни четири години се соочува со криза во работењето.

– Само што се понадевавме дека излеговме од загубите направени за време на кризата поради ковид-19 и ни се отвори можноста да се избориме со конкуренцијата, сега сме соочени со нова, која ни ја направи државата со промена на патните документи и регистарските таблички со новото име на државата – изјави неодамна Нацев.