Вишиот управен суд со пресуда (УПРЖ бр.63/2024) го потврдил решението на Комисијата за заштита на конкуренцијата со кое Комисијата утврдила дека две големи веледрогерии АД Д-р Пановски и Фарма Трејд ДООЕЛ Скопје склучиле забранет договор – КАРТЕЛ, при учество во постапка за јавна набавка на инсулин, глукагон, инсулински игли и ленти за мерење шеќер и инсулински пумпи со потрошен материјал, соопштија од Комисијата за заштита на конкуренцијата за „Слободен печат“.

-Се работи за јавна набавка која во 2016 година е распишана од страна на Министерството за здравство на Република Македонија при што двете веледрогерии спротивно на Законот за заштита на конкуренцијата склучиле забранет договор-картел со кој свесно и со намера да се стекнат со противправна имотна корист на штета на државата го замениле принципот на слободна конкуренција на пазарот со забрането договарање на продажните цени на лековите – детализираат од КЗК.

Комисијата за заштита на конкуренцијата при откривање и документирање на овој картел го имала предвид домашното законодавство, но и судската пракса на Европската Унија.

-За учество во предметниот картел Комисијата со решението изрече прекршочни санкции глоба и тоа на АД Д-р Пановски во износ од 1.061.000 евра и на Фарма Трејд ДООЕЛ – 721.000 евра. Висината на наведената глоба е во корелација со штетата која е нанесена на буџетот на државата. Решението на Комисијата за заштита на конкуренцијата е потврдено од страна на Управниот суд и Вишиот управен суд и истото е правосилно и извршно и претпријатијата треба да ја платат глобата во законски утврдениот рок. Комисијата за заштита на конкуренцијата за откриениот картел ќе поднесе соодветно известување до Управата за финансиска полиција и Јавното обвинителство заради натамошно постапување од нивна страна во соодветна кривична постапка – велат од КЗК.