Најопасниот картел за фентанил во светот, познат како Синалоа, е во процес на внатрешно преструктуирање што би можело да го промени криминалното подземје низ десетици држави. Фракциите во картелот, исцрпени од конфликти и притисок од властите, решија да го направат незамисливото – тие склучија сојуз со нивниот долгогодишен ривал, картелот „Нова генерација на Халиско“, пишува „Њујорк тајмс“.

Овој сојуз, потврден од повеќе извори, открива како фракцијата Лос Чапитос, предводена од синовите на озлогласениот наркобос Хоакин „Ел Чапо“ Гузман, се согласила да предаде дел од својата територија на картелот Халиско во замена за пари и оружје.

„Како Источниот брег на Соединетите Американски Држави да се здружил со Советскиот Сојуз за време на Студената војна“, рече Ванда Фелбаб-Браун, експерт за безбедност во Институтот Брукингс. „Ова има глобални импликации за тоа како се одвива конфликтот и како се реорганизираат криминалните пазари“, додаде таа.

Од непријател до партнер

Војната меѓу двете нарко-банди одзеде многу животи, но по долгорочните загуби и исцрпувањето на ресурсите, Лос Чапитос, под притисок од администрацијата на Трамп, која бараше порешителна акција против фентанилот, се согласи да му предаде територија на картелот Халиско во замена за пари и оружје.

Според аналитичарот за безбедност Едуардо Гереро, спојувањето на двете криминални сили ќе значи експлозивен раст во производството и дистрибуцијата на фентанил.

„Како да го донесете Меси во вашиот тим“, сликовито ја опиша ситуацијата.

Падот на старите правила, пораст на насилството на улиците

Картелот Синалоа со децении доминираше на шверцерските патишта, заработувајќи милиони долари од трговија со фентанил, особено во Соединетите Американски Држави. Но, во последните месеци дојде до поделба меѓу двете главни фракции – онаа предводена од синовите на Ел Чапо и онаа предводена од Исмаел Замбада Гарсија, познат како Ел Мајо.

Во обид да го одржат влијанието, Лос Чапитос бараа сојуз со „Нова генерација на Халиско“. Според висок член на картелот Синалоа, „тие се задушуваа, повеќе не можеа да го издржат притисокот“. „Замислете колку милиони губите дневно во војна: борци, оружје, возила… Притисокот постепено се зголемуваше“, рече истиот извор.

Притисок доаѓа и однадвор. Мексиканската влада, под силен притисок од администрацијата на Трамп, започна со мерки против производството на фентанил. Стотици дополнителни војници се испратени во државата Синалоа, додека редовно се објавуваат вести за рации во лаборатории, апсења и заплени на дрога.

„Алијансата е планирана со месеци“, рече еден оперативец, додавајќи: „Преговорите се водеа во неутрални зони, па дури и надвор од Мексико. Тоа е како САД и Кина да треба да постигнат договор – никој не сака прв да влезе на непријателска територија“.

Улични ужаси и ширење на насилство

Безбедносниот аналитичар Едуардо Гереро предупреди дека комбинирањето на финансиските ресурси и меѓународната мрежа на Ел Чапо со воените капацитети на „Нова генерација на Халиско“ може да создаде невидена сила. „

Тоа е како да го донесете Меси во вашиот тим“, рече Гереро. „Спојувањето на двете сили ќе значи огромен глобален производствен капацитет“.

Но, тој предупредува дека пактот ќе донесе нов бран насилство, бидејќи бројни помали групи веројатно ќе се побунат или ќе се обидат да ја одржат контролата врз локалните шверцерски патишта.