Во Белград се одржува дванаесеттиот протест на граѓаните и опозицијата собрани околу коалицијата „Србија против насилството“ поради, како што тврдат, изборна кражба и нерегуларности во врска со парламентарните и локалните избори одржани на 17 декември.

Изборните нерегуларности и неодговорноста на институциите на тврдењата на опозицијата беа причина потпретседателката на Партијата за слобода и правда и пратеничка во претходното свикување на Собранието, Мариника Тепиќ, да започне штрајк со глад. Дванаесет дена не земала храна, а нејзиниот пример го следат и неколку пратеници од опозицијата, кои бараат да се поништат изборите.

Во тек се и студентски блокади кои ќе траат до утре до 12 часот. Како што најавија претходно, студентите ќе се приклучат на протестот на ПроГлас закажан за утре.

Демонстрантите во Белград изутрината поставија шатори на раскрсницата во владиниот кварт и најавија 24-часовна блокада. За утре се планира протестен марш во главниот град на Србија. Демонстрантите бараат поништување на официјалните изборни резултати и нови избори во државата.

Владеачката партија на претседателот Александар Вучиќ, Српската напредна партија (СНС), според официјалните резултати, победи јасно на парламентарните и локалните избори одржани на 17 декември. Меѓународните набљудувачи, меѓутоа, зборуваат за голем број неправилности.

Републичката изборна комисија (РИК) денеска го отфрли приговорот на опозициската коалиција „Србија против насилство“ за поништување на изборите, зашто, како што се вели, листата на оваа коалиција во Белград не е овластена да поднесе барање до РИК. Како што рече заменик претседателот на РИК, Марко Јанковиќ, овој приговор овластените лица од белградската листа го доставиле до Градската изборна комисија, која се прогласила за ненадлежна и го доставила до РИК за одлука.