Пожарот кој избувна вчера попладне околу 14 часот во непосредна близина на валандовско село Грчиште утрово е ставен под контрола откако сите четири критични точки се успешно покриени, информира заменик директорот на ЈП „Национални шуми“ Кире Михаилов кој додаде дека при гаснењето се повредени две лица од претпријатието.

Михаилов истакна дека пожарот имал четири критични точки кои се успешно покриени и додаде дека во неговото гаснење учествувале повеќе од 60 луѓе.

-Повеќе од 60 луѓе од 5 часот наутро се на линијата на огнот и до овој момент може да кажеме дека и покрај тоа што беше голема, целата линија на огнот е покриена. За жал во вчерашниот пожар лесно беа повредени и двајца колеги од ЈП „Македонски шуми“, при што на едниот му беше дадена кислородна поддршка, а другиот беше пратен во Општа болница Струмица за понатамошна помош – вели Михаилов.

Тој се заблагодари на луѓето од подружниците на  ЈП „Национални шуми“, противпожарните служби, доброволците и шумската полиција за нивниот огромен придонес при гаснењето на пожарот.