Од Основното јавно обвинителство Струга информираат дека е донесена наредба за спроведување истражна постапка против двајца, од кои едниот е осомничено за обид за убиство и за насилство, додека пак вториот се товари дека бил помагател во обидот за убиство.

Имено, државното Јавно обвинителство информира дека на 2 август, поради претходно нарушени меѓусебни односи, првиот осомничен се обидел да убие едно лице, а вториот осомничен најпрвин со својот автомобил БМВ Х6 му го попречил патот на „фолксваген голф 7“ во кој се превезувал оштетениот и уште едно лице.

-Двајцата осомничени излегле и се упатиле кон оштетените и ги нападнале физички, најпрво удирајќи ги со боксови. Во еден момент првиот осомничен извадил нож и му нанел повеќе убодни рани на оштетениот во стомакот, надлактицата и вратот, со што му предизвикал тешки телесни повреди. За тоа време вториот осомничен извикувал и го поттикнувал да го доврши делото. Сведокот-оштетен се обидел да ги оттргне и да ги спречи, па првиот осомничен и врз него извршил насилство, расекувајќи го со ножот на раката и предизвикувајќи чувство на загрозеност и страв во јавноста – соопштија од ЈОРСМ.

Јавниот обвинител до судијата на претходна постапка од Основниот суд во Струга доставил предлог за определување мерка притвор за двајцата осомничени.