Филипинскиот претседател Родриго Дутерте денеска ги увери Филипинците дека неодамнешниот скок на бројот на случаи на коронавирус не треба да биде причина за загриженост, бидејќи властите соопштија дека се очекува да пристигнат повеќе вакцини.

Една година откако воведе рестрикции поради епидемијата, Дутерте рече дека пандемијата е само „мал” предизвик за Филипинците.

– Можеме да го победиме Ковид-19. Ова е мала работа. Поминавме многу. Не плашете се, нема да ве оставам, рече тој во своето неделно телевизиско обраќање.

Филипнското Министерство за здравство претходно соопшти дека се регистрирани 5.404 нови случаи, со што вкупниот број достигна 626.893 заразени лица.

Бројот на починати изнесува 12.837.

Бројот на дневни случаи се зголемува од минатата недела и викендов достигна максимум во последните шест месеци, откако во земјата беа откриени позаразните мутации на коронавирусот.

Владата почна вакцинација на 1 март, но досега, земјата доби само 600.000 дози од кинеската вакцина Синовак и 525.600 дози на АстраЗенека преку механизмот Ковакс на Светската здравствена организација.