Трагедијата во дискотеката „Пулс“ ги разбуди барањата за правда и на семејствата на жртвите од трите несреќи кои ѝ претходеа на најголемата што се случи во Кочани – оние кои загинаа во Ласкарци, оние кои изгореа во модуларната болница во Тетово и оние кои изгореа во автобусот во Бугарија. До нив стигна и ветување од премиерот Христијан Мицкоски кој во моменти кога го обвинуваат за селективни апсења само на поранешни функционери, ветува расчистување до крај на претходните трагедии во кои загинаа вкупно 75 луѓе.

Очекувам обвинителството многу јасно да ја прошири истрагата и да го идентификува не само возачот на автобусот или управителот на правното лице, туку да видиме во кој испитен центар кажале дека тој технички е исправен, кој ја дал дозволата тој испитен центар да функционира така што функционира.

-Зошто во модуларната болница е променето министерството од едно во друго кога е правена јавната набавка, зошто кабелот е виновен, кој го направил проектот и дали можеби недостасуваат некои елементи, таму каде што мислам дека недостасуваат. За сето ова ќе има одговор, ќе има разврска. Нема ништо да оставиме. Јас ви реков, тргнавме, нема сега запирање, сега одиме до крај. Или тие или ние. Во животот постојат две работи, или тој или ти. Не може двајцата да опстанат, или ние ќе опстанеме, Македонија и граѓаните од една страна, или мафијашите. Нема повеќе место за двајцата – вели Мицкоски.

Постапките за модуларните уште во предистрага

Но, додека премиерот ветува и им дава надеж на семејствата на загинатите кои со години одат по судови, прстот за тоа кој треба да испорача го вперува во Обвинителството.

-Надлежен орган за разгледување на правната можност за проширување на истрага е Обвинителството, кое за жал сѐ уште за многу од горенаведените случаи или нема соодветно поведена истрага, или истата сѐ уште не е завршена, иако е поминат и пробиен рокот за завршување на истраги. Цениме дека ова се легитимни прашања и сомнежи за тоа дали ќе се посветиме на целосна правда или ќе бидеме сведоци на селективна правда. Борбата против криминалот и корупцијата не е само декларативна заложба, тоа е обврска и наш приоритет што мора да се спроведе доследно и суштински. Затоа нема да има отстапки за никого. Само ако сме истрајни и принципиелни во таа борба, можеме да изградиме држава во која сите сме еднакви пред законот – велат од Владата за „Слободен печат“.

Од Обвинителството, пак, се децидни дека сите предмети се водат единствено врз основа на докази.

Јавното обвинителство постапува во сите предмети поединечно единствено врз основа на доказите и тие одредуваат против кое лице се води или ќе се води постапка во иднина – велат од Обвинителството за „Слободен печат“, не навлегувајќи во политичките изјави што се испраќаат до нив и барањата на семејствата на жртвите.

Според едни правни толкувања, Обвинителството има надлежност да истражува и доволно е да се земе предвид нова околност или факт што не е ценет, додека според други правни толкувања, за да има некакво проширување на која било истрага треба да бидат доставени нови докази за нови осомничени. Обвинителството, според она што се случува досега, најверојатно се води според второто толкување.

Трите предмети се во различни фази, но она за што не може да се најде логично образложение е тоа што втората истрага која ја отвори Обвинителството за гонење на организиран криминал и корупција која требаше да ја проверува тендерската документација за сите модуларни болници, а која ја води обвинителката Елизабета Јосифовска со години е во предистражна постапка и уште не е донесена јавнообвинителска одлука.

-Основното јавно обвинителство за гонење на организиран криминал и корупција постапува во предистражна постапка во друг предмет поврзан со модуларните болници. Во предметот не е донесена јавнообвинителска одлука – велат од Обвинителството.

За „тешки дела против општата сигурност“ по втор пат им се суди на директорите од тетовската болница Флорин Бесими и Артан Етеми откако првиот пат беа условно осудени па Апелација го врати случајот на повторно судење. Но и на повтореното судење судот не прифати да сведочат вештите лица од Германија кои имаат изработен извештај, и покрај барањата на одбраната.

Судијата Реџеп Муса истакна дека според насоките на повисокиот Апелациски суд предлогот на одбраната се одбива.

-Постојат доволно докази за околности на настанот – посочи судијата.

„Дурмо турс“ пред Апелација

Обвинителството тврди дека во постапката е изведено и вештачењето на германските експерти.

-Во однос на трагедијата во модуларната болница во Тетово, Основното јавно обвинителство Тетово води судска постапка за кривично дело – Тешки дела против општата сигурност, со конкретни дејствија за секој од обвинетите, согласно утврдените пропусти со направените вештачења. Судската постапка пред Основниот суд во Тетово е во тек, судењата се јавни, а пресудата ќе ја донесе Судот. Во судската постапка обвинителството ги изведува сите докази прибавени во постапката, вклучително и вештачењето од германските експерти, а одлуките на судот дали ќе прифати или не барање од одбраната на обвинетите не е во можност да ги коментира – велат оттаму.

Филипче кој сега е претседател на опозициската СДСМ и се среќава со премиерот Мицкоски не стравува од одговорност ако се реотвори случајот за тоа како изгоре модуларната болница во Тетово, но и случајот за нивната изградба.

-По тој случај јас поднесов оставка од морални причини. Ако ме прашувате лично, не стравувам од ништо. Ако кој било смета дека треба да се отвори кој било случај, јас тоа го поддржувам – рече Филипче.

За случајот „Дурмо турс“ кога загинаа 16 патници кај Ласкарци во 2019 година, се чека одлука на Апелација и во овој случај нема ниту еден правосилно осуден. Со првостепената пресуда, возачот на автобусот Маноил Трифуновски доби најмногу – 14 години, а сопственикот на „Дурмо турс“, Дурмиш Белули – четири години, најмалку од сите обвинети. На шест години беше осуден Ремзи Мифтари, шеф на возниот парк на „Дурмо турс“, а на пет години затвор тројца вработени во техничкиот центар на истоимената фирма.

Втора пресуда чека и возачот на автобусот од „Беса транс“, Беким Хаџиу, но за тоа што автобусот ја поминувал границата со лажна лиценца откако истрагата во Бугарија како единствен виновник за несреќата во која загинаа 45 патници го посочи возачот на автобусот кој е мртов.

По несреќата во Кочани пак се зголеми бројот на жртви на 60 откако почина Александар Карадакоски, а се намали бројот на осомничени на 33 со оглед на тоа што тој беше управител на компанијата која управувала со дискотеката „Пулс“.

Три големи трагедии, ниту еден правосилно осуден виновник