Цените на производите од новогодишната акција за поевтина храна и пијалаци, која почна на 15 декември и ќе трае до 15 јануари, се намалени за 10 проценти и повеќе, констатираа министерот за економија труд Бесар Дурмиши, неговиот заменик Марјан Ристески и директорот на ДПИ, Влатко Стојаноски, кои здружено инспектираа како трговците се однесуваат кон идејата која тие ја предложија. Државниот пазарен инспекторат, пак, како што соопшти директорот Стојаноски, регистрирал ситни забелешки во однос на означувањето на производите и ситни корекции кај цените на два-три трговски субјекти.

-Инспекторите не регистрираа отстапување од договореното за поевтинување на производите за 10 проценти во однос на нивната најниска цена во последните 30 дена пред почетокот на акцијата – рече Стојаноски. Листата со производи од акцијата и натаму е отворена а од стартните 600, надмина 1.100 артикли.

-При нашата посета на маркетите, видовме дека сите понудени производи се означени со етикетата „помалку трошоци, повеќе за вас“, а тие се намалени се за 10 проценти и повеќе. Ме радува фактот што за  многу кратоко време бројката на производи достигна над 1.100 од 95 трговци на 42 ланци на маркети – изјави Дурмиши.

Според него, најголеми инспектори се граѓаните.

– Јас ги известувам, ако забележат изигрување на цените да се јават на бесплатниот број 191 или на веб-страницата на Државниот пазарен инспекторат -, повика министерот Дурмиши.