Последните анализи на Центарот за јавно здравје Тетово, покажаа дека речиси 70 % од селата во тетовско имаат неисправна вода за пиење. Водата во селските водоводи е бактериолошки неисправна со колимфорни бактерии.

Нередовното хлорирање на водата, како и необезбедените изворишта на селските водоводи, се двете главни причини поради што мештаните од тетовските села пијат неисправна вода. Постојано укажуваме да се врши хлорирање, но апелите ретко стигнуваат таму каде што треба, велат од Центарот за јавно здравје Тетово.

„Последните извештаи покажуваат поразителни резултати, односно 67 % од испитаните мостри се бактериолошки неисправни, а уште полош резултат има од чешмите покрај селските патишта. Таму 76 % од испитаните примероци се позитивни, односно водата е небезбедна за пиење, така што апелирам да се биде внимателен кога се оди на излети каде имаме чешми покрај патиштата“, изјави доктор Ратко Давидовски специјалист по хигиена и здравствена екологија од Центарот за јавно здравје Тетово.

Голем број од селските водоводи во тетовско ги раководат месните заедници, кои не се доволно организирани и функционални. Водоводите се запуштени, а на крајот од селските чешми наместо чиста шарпланинска вода мештаните добиваат вода со фекалии.

„Треба да има дезинфекција со хлорни препарати. Не дека се најдобри, туку дека се најевтини. Знаејќи ја финансиската состојба на јавните претпријатија, тоа е најголем проблем. И покрај оваа состојба луѓето ја користат водата, но тие се навикнати што не е добра пракса, некој од страна ако се напие од таа вода на пример ќе има стомачни тегоби“, дополни доктор Давидовски.

Од Центарот за јавно здравје Тетово апелираат планинарите да не ја користат водата од шарските извори која исто така е загадена оти сега во овој период од годината овците се на пасишта, а дивите животни во потрага по храна, што е најголема причина за загадување на изворите.