Денешното трето по ред рочиште за случајот „Рекет 2“ се одлага поради неприсуство на обвинетиот Бојан Јовановски. Неговото неприсуство е од една и единствена причина, односно неговата нарушена здравствена состојба.

И после извршената операција во Градската болница во Скопје, тој таму беше задржан на лекување 10 дена.

-Стануваше збор за многу сериозна операција. По операцијата беше вратен во истражниот затвор „Скопје“, меѓутоа после два дена му се влоши здравствената состојба и од минатиот понеделник, веќе 10 ден тој е во болница, изјави денеска Сашо Дуковски, адвокатот на првообвинетиот во „Рекет 2“, Бојан Јовановски.

Дуковски го интерпретираше лекарот кој директно го лекува, кој рекол: „ Не да се подобрува, туку се влошува здравствената состојба на Бојан Јовановски“.

-Раната не му зараснува. Се работи за кератозирано ткиво, односно за зацврстено ткиво каде што секое таканаречено крпење на желудникот е тешко и не случајно некој човек затоа што е здрав се држи во болнички услови, затоа што ни од далеку истото не може да се спроведе во затворот „Скопје“. Вчера ние добивме решение за одбивање на нашиот предлог за замена на мерката затворски со домашен притвор. Едноставно, човек што е опериран од таква болест и со таква операција не може да биде третиран во најсериозните демократии во затворски услови, а не па во затворот „Скопје“. Вчерашното одбивање на мерката замена за притвор не претставува ништо друго, туку е најчист облик на кривично дело тортура предвиден во Кривичниот законик – рече Дуковски.