Полскиот претседател Анджеј Дуда денеска одбил да биде на заедничка фотографија со другите светски лидери на климатскиот самит „COP29“ во Баку, јави агенцијата „Анадолу“.

Според неофицијалните информации на полската новинска агенција ПАП, Дуда тоа го сторил затоа што не сакал да биде на иста фотографија со белорускиот лидер и сојузник на Владимир Путин, Александар Лукашенко.

Од истата причина, минатата година Дуда не позираше на заедничката фотографија на учесниците на климатскиот самит COP28 во Дубаи, наведува ПАП.

Климатскиот самит на Обединетите нации се одржува секоја година, а оваа година средбата беше организирана во главниот град на Азербејџан, Баку, под слоганот „Во солидарност за зелен свет“.