За една година, Мицкоски ја направи Македонија понижена, осиромашена и украдена, реагира СДСМ по вечерашниот презентиран отчет.  Според социјалдемократите, излагањето на Мицкоски е уште една потврда дека тој целосно се загубил помеѓу неговите лаги и реалноста.

„Не може да биде точно, ниту реално, тврдењето дека Македонија е четврта најсилна економија во Европа. Вистината е сосема спротивна. Дури и Народната банка, со која раководи Трајко Славевски, ја ревидираше проекцијата за инфлацијата на околу 4% за оваа година, додека економскиот раст, според домашните институции, нема да надмине 3%. Тоа значи реален економски пад – ситуација полоша дури и од конфликтната 2001 година, кога Македонија оствари подобри резултати. Податоците на Евростат јасно и недвосмислено покажуваат: Македонија е последна во Европа по животен стандард. Најниската плата и најмалата куповна моќ се реалноста со која секојдневно се соочуваат граѓаните“, се вели во соопштението.

Од опозициската партија посочуваат и дека не се точни тврдењата на Мицкоски дека долгот на државата е намален, бидејќи како што велат за само за една година, Македонија потпиша нови задолжувања од 7 милијарди евра, а најавени се уште 700 милиони за наредната година.

„Мицкоски зборува за енергетика во моменти кога се соочуваме со најлошата енергетска политика во историјата на државата. За прв пат во 35 години РЕК Битола не работи повеќе од седум дена. Најголемиот енергетски потенцијал во земјава е во целосна хаварија откако раководството на ЕСМ и РЕК Битола поставено од Христијан Мицкоски е во целосен колапс. Потрошени се и хидроенергетските потенцијали во земјава, поточно, во период кога акумулациите низ земјава треба да бидат на својот потенцијален максимум, тие се на својот биолошки минимум со што се доведува во ризик потенцијалот за производство на електрична енергија во текот на зимските месеци кога електричната енергија е најскапа на меѓународниот пазар. Македонија за една година има повеќе увезено струја отколку во последните три години власт на СДСМ. Пари кои директно се одлеваат од џебовите на граѓаните, а се плаќаат на фирми блиски до Мицкоски. Нема ништо ниту од помпезно најавената инвестиција во ветерници од наводни 500 милиони евра. На таа локација има само ливада за пасење овци“, сметаат социјалдемократите.

СДСМ во соопштението се осврнуваат и на владините политики во земјоделството, сметајќи дека е срамота премиерот да се фали со исплата на субвенции, кога се уште се не исплатени субвенциите од минатата година.

„Иако во изборната програма ветуваа зголемување на субвенциите на 180 милиони евра, оваа година исплатија едвај 130 милиони задоцнети субвенции.  Нема субвенции за тутунот кој се поретко се класифицира во прва класа од страна на откупувачите кои во содејство со министерот за земјоделие намерно ги туркаат цените на тутунот. Нема ни вода за тутунот во Пелагонија. Цел месец не се санира доводната цевка за наводнување на полињата. Субвенциите за грло говедо се намалени за 50%, а намалени се и субвенциите за лозарите.  Оризопроизводителите не можат да го продадат оризот поради новите правила кои фаворизираат само двајца откупувачи на ориз, а се блиски до владејачката ВМРО-ДПМНЕ. Секојдневно гледаме гневни земјоделци кои на камера го уништуваат родот поради ниските цени, неисплатените субвенции и неподносливите услови за работа во земјоделието“, сметаат од СДСМ.