Властите во популарниот туристички град Аликанте наредија баровите, рестораните и ноќните клубови да се затвораат рано во две области означени како „зони на акустична сатурација“. Ова доаѓа во време на борбата на Шпанија против прекумерниот туризам. Едната зона ќе покрива делови од Стариот град, а другата центарот околу улицата Кастањос. Ќе се преполоват и терасите на рестораните.

Така, баровите и рестораните ќе мора да затвораат во 1 часот по полноќ во петок и сабота, како и во пресрет на празниците (за ноќни клубови – затворање во 3 часот по полноќ). Во останатиот дел од неделата, затворањето ќе биде во 00:30 часот (за ноќни клубови – 1 часот по полноќ). Истовремено, уличните тераси ќе треба да се расчистат половина час пред затворањето на објектите. Ограничувања ќе важат и за објектите кои продаваат пекарски производи, готова храна, весници или пијалаци.

Градскиот совет на Аликанте ја одобри мерката на 11 февруари 2025 година и може да стапи на сила веќе на крајот на март. Овој потег дојде како одговор на жалбите на жителите за прекумерна бучава. Новото правило исто така го запира издавањето на нови лиценци за ноќни клубови, барови, ресторани, кафулиња, караоке барови, па дури и бинго сали. Суспендирано е и одобрувањето на барањата за нови тераси. Во меѓувреме, локалните власти најавија специјална полициска операција за набљудување на работното време и расчистување на терасите на баровите, вклучително и растурање на толпата во близина на просториите. Одделно, едно од популарните одморалишта во провинцијата Аликанте им се закани на туристите со казни за „резервирање“ места на плажата, објави БГНЕС.