Досега, купувачите во Европа мораа да поминат низ сложени царински процедури и да го подигнат возилото во пристаништето. Сега, благодарение на платформата China EV Marketplace, тие едноставно можат да нарачаат автомобил преку интернет, а компанијата се грижи за целата потребна документација и организира испорака- објави Каматица.

Јакуб Гершл, директорот за операции на China EV Marketplace, изјави за порталот CarNewsChina.com дека ова е прв пат европските клиенти директно да нарачаат електричен автомобил од Кина и да им биде доставен на нивната домашна адреса. Според податоците на оваа компанија, во првата половина од годината продале 7.000 возила низ целиот свет, што претставува раст од 66% во споредба со претходната година. Растот на продажбата е најмногу поттикнат од побарувачката за plug-in хибридни модели, со оглед на тоа што целосно електричните возила во Европската Унија можат да подлежат на царински давачки до 35%.

Иако се популарни во Кина, таканаречените електрични автомобили со продолжен дострел (EREV) речиси исчезнаа од пазарот бидејќи ЕУ ги класифицира како чисто електрични модели, што ги прави предмет на високи царини.

Додека продажбата на кинески електрични возила на американскиот пазар драстично опадна, во Европа се забележува спротивен тренд. Според извештајот на Jato Dynamics, кинеските производители ја зголемиле својата продажба за 111% во мај оваа година, достигнувајќи 65.808 регистрирани автомобили. Ова претставува 5,9% од европскиот пазар, додека една година претходно нивниот удел беше само 2,9%.

Клучното прашање е до кој степен директната испорака ќе влијае на куповната моќ на европските потрошувачи. И покрај трговските војни, Кина очигледно зазема сè поголем дел од пазарот на автомобили на „стариот континент“.