Досега преку Црвениот крст се собрани 54 милиони денари за семејствата на починатите и повредените во кочанската дискотека „Пулс“. Како што изјави генералниот директор на Црвениот крст, Саит Саити, 12 милиони денари од собраните пари се преку телефенската линија 143-400.

– За да се префрлат финансиските средства на корисниците, потребно е трансакциска сметка и матичен број. Потребна е писмена изјава на лицето кое го дава податокот. Во тек се подготовките. Црвениот крст успеа да ги собере податоците за починатите. Се договоривме за лицата кои се лекуваат во странство, податоците да ги соберат заедничките служби на Владата. Остатокот ќе го добиеме во текот на денот – информира денеска Црвениот крст.

Од Црвениот крст велат дека сето тоа ќе успеат да го завршат денеска и утре и веднаш потоа пристапуваат кон исплатата на средствата.

-Непочитувањето на Законот за лични податоци е исто дело како и секое друго дело. Мораме да ги почитуваме законите. Ова мора да биде вака како што е регулирано согласно законите во државата. Сè уште е голем интересот за донација. Можеби ќе го завршиме денот со собрани 60 милиони денари. Во наредните два-три дена сите ќе ги добијат првични пари, а за остатокот имаме време после тоа да се договориме по која методологија и на кој начин – рече на прес-конференција, Саит Саити.