Словенија ја оправда улогата на фаворит и конечно дојде до првата победа на Евробаскетот, убедливо совладувајќи ја Белгија со 86-69 во третото коло од групната фаза.

Главниот диригент на словенечката победа беше Лука Дончиќ, кој испиша историја со својот прв трипл-дабл во националниот дрес. Суперѕвездата на Лос Анџелес Лејкерс мечот го заврши со 26 поени, 10 скокови, 11 асистенции и три украдени топки, станувајќи само четвртиот кошаркар со трипл-дабл во историјата на Европските првенства.

Белгија поведе само во воведните секунди со 0-2, но од тој момент натпреварот мина во знакот на Словенија. По првите десет минути, резултатот гласеше 16-10, а во втората четвртина разликата порасна на двоцифрена (23-12). На полувреме Словенците имаа сигурно водство од 43-31.

До крајот на средбата избраниците на селекторот Секулиќ не дозволија изненадување. Со контрола на играта и стабилна одбрана, предноста само растеше, па на крајот се запиша убедлива победа од 17 поени разлика. Покрај Дончиќ, се истакна и Препелиќ со 12 поени, додека кај Белгијците најефикасен беше Ван Влет со 15.

За Словенија ова беше прв триумф на турнирот, откако претходно загуби од Полска и Франција. Во друг натпревар од групата, Грција ја потврди добрата форма и ја декласираше Грузија со 94-53.