Се поизвесно е дека по завршување на сезоната, италијанскиот репрезентативен голман Џанлуиџи Донарума ќе го напушти Милан бидјеќи му завршува договорот, а двете страни не можеа да најдат заеднички јазик за продолжување на соработката.
Агентот на голманот, Мино Рајола, ги шокира челниците на Милан барајќи 12 милиони евра по сезона за нов договор, додека „росонерите“ понудија само осум милиони евра.
Поради тоа, челниците на Милан тргнаа во потрага по наследник на Донарума и решението го најдоа во Франција.

Милан ги договори личните услови, односно се договори за петгодишен договор со голманот на Лил, Мајк Мањан. Договорот на Мањан истекува 2022 година и се очекува Милан да седне на преговори со челниците на Лил бидејќи немаат намера да платат 25 милиони евра за играч на кој договорот му истекува за една година.

Што се однесува до Донарума, тој има неколку понуди од кои најсериозни се тие на Јувентус и на ПСЖ кој може да му понуди далеку поголема плата од „старата дама“.