
Докторка со свој исказ на завршната доказна постапка: „За Модуларната болница Тетово немаше раководител“
Заврши доказната постапка за судскиот процес за Модуларната болница Тетово. На наредното рочиште закажано за 25 април ќе се прочитаат завршните зборови, а потоа ќе биде објавена пресудата.
Препорачано
Денеска беа сослушани тројца сведоци, вработени во Клиничката болница Тетово.
Ерселе Треси, докторка вработена во Клиничката болница Тетово, пред судот даде исказ дека за Модуларната болница немало раководител, одговорноста за неа ја преземаше тој што беше на смена, посочи таа. Приоритет на вработените во болницата беа пациентите, а не самиот објект, дали во него имало или немало ПП – апарати.
„Јас во Модуларната болница работев откако го пуштија објектот во употреба, инаку работам како доктор. Мислам дека сум видела ПП – апарати, но не се сеќавам точно оти тоа не ми било приориотет, приоритет ми беше да се грижам за пациентите. Во Модуларната болницата немаше раководител, тој што беше на смена ја преземаше одговорноста за модуларната болница, сведочеше Ерселе Треси, докторка вработена во Клиничката болница Тетово.
Пред Судот со свои искази еден вработен од обезбедување и еден вработен кој се грижи за одржување на објектите во болницата. Тие пред судот изјавија дека виделе ПП – апарати во модуларната.
„Работам во болницата во Интерното одделение, работам како обезбедување. Вршев некои работни задачи во Модуларната болница, како носење на лекови и слично. Во текот на денот влегував во модуларната 5 до 6 пати, имаше починати ги изнесував. Имаше во Модуларната болница противпожарни апрати. На влезната врата на објектот имаше натпис на кој стоеше „Забранет влез“ и вратата беше затворена со клуч, изјави Башким Ибрахими вработен како обезбедување во модуларната болница.
„Наместо хуманите доктори да се наградуваат тие се „влечат“ по судници
Пред да започне судскиот процес пред Основниот суд во Тетово и денеска тетовци одржаа мирен собир за подршка на трето обвинетиот доктор Бобан Вучевски. Посочија дека докторот е „жртвено јагне“ ,а неговото место не е во судот тука во болницата и меѓу пациентите.

„Мислам дека не е фер ова што му го направија на доктор Бобан, само да најдат некого да жртвуваат. Немаат смисла обвиненијата со тоа што се случи со палењето на модуларната болница. Тука сум за подршка на доктор Бобан. тие му одземаат само време кое е потребно за да спаси повеќе животи, не може да работи човекот како што треба“, изјави една учесничка на протестот.
„Денеска сме дојдени да му да дадеме подршка на нашиот најхуман колега доктор Бобан, кој за жал поради системот кој не ни функционира наместо добрите, вредните и хуманите доктори да се наградуваат тие се „влечат“ по судници, нажалост таков е нашиот систем. За жал, можам да кажам и да изразам едно жалење, наместо толку мал број колку сме собрани сега треба цело Тетово да биде тука, затоа што доктор Боби е еден од најхуманите луѓе кој за време на целата пандемија додека владееше ковидот 24 часа и седум дена беше на работа. Зарем овој наш колега немаше семејства, немаше деца, животот го посвети на пациентите, каде се сега тука колегите, а не само да се правиме силни на Фејсбук. Колегата не беше крив зошто имало посета, кривицата беше зошто немаше доволно медицински персонал во нашата болница и благодарение на посетата на роднините, немаше повеќе жртви. За жал тие што ни се стручни ние ги бркаме од нашата земја, заминуваат во странство“, додаде една учесничка на мирниот собир.
Тетовското Обвинителство ги обвини двајцата директори Фљорин Бесими и Артан Етеми за кривично дело тешки дела против општата сигурност и докторот Бобан Вучевски за кривично дело непостапување според здравствени прописи за време на епидемија, а Клиничката Болница Тетово како правно лице, за кривични дела предизвикување на општа опасност и непостапување според здравствени прописи за време на епидемија.
Во октомври 2021 година, по вештачењето на МВР, Обвинителството информираше дека пожарот во модуларната настанал како последица на запален продолжен кабел, на кој бил приклучен апарат за реанимација.