Созреани се условите минималната плата во земјава да биде 500 евра, а членките на Комората на Северозападна Македонија се подготвени и да им ја исплаќаат на своите вработени, ако државата ги намали придонесите од 47,7 на 32 отсто, порача претседателот Менди Ќура. Тој рече дека е невозможно поинаку да се дејствува, бидејќи кај нас придонесите се скалести и се движат и до 52 отсто за исплатената плата од 1.000 евра. Ќура се повика на словенечкиот модел, кој предвидува намалување, а не раст на придонесите паралелно со растот на платите и од вкупниот износ од 42 отсто за највисоките плати се спушта надолу за минималецот.

-Ова е наше старо барање, но државата мора да размисли околу намалувањето на товарот за компаниите. Работниците заслужуваат минимална плата од 500 евра, но и државата треба да ги намали придонесите за неа – додаде Ќура.

СКСЗМ се залага за преквалификација на вработените во јавната администрација, која според Ќура е прегломазна и троши огромен дел од Буџетот, додека бизнис-заедницата која го полни кубури со недостиг на работна сила.

-Бараме да се креира и спроведе стратегија за прераспределба на службениците од јавниот во приватниот сектор, со посебен модел на бонуси и отпремнина за да ги привлечеме административците да ги напуштат своите фотелји. Во тој случај товарот би се поделил меѓу компаниите и државата, сè со цел да се искреира солиден модел за оваа обемна операција – истакна Ќура.

Од оваа Комора бараат ревидирање и операционализација на нов систем за увоз на работна сила од странство, каде што Агенцијата за национална безбедност ќе дава мислење, односно дозвола за нив.

-Во моментов реалниот сектор има потреба од 15.000 работници, додека активни баратели се 97.000 лица. Мора да увезуваме работници, но условите треба да се олеснат. Во 2022-та активното население изнесуваше 808 илјади, а во 2024-та – 795 илјади, забележувајќи намалување од 12 илјади. Има проблеми во сите сектори, а тие дупки мора да се пополнат, ако сакаме продуктивност и економски раст – вели Ќура.

Претседателот на СКСЗМ бара итна интервенција од Владата за да се намали сивата економија, која е на ниво од 35 отсто од БДП, а според различни извори достигнува и до 39 отсто од БДП.

-Во нашето „најдобро сценарио“, сивата економија годишно ја чини државата над 700 милиони евра, додека во „најлошото сценарио“ ја надминува вредноста од 1,7 милијарди евра, како потецијално загубени буџетски приходи – објасни Ќура.